چین کے پالے میں نہیں نیپال ، ہندوستان سے ہی رہیں گے اچھے تعلقات : سابق وزیر اعظم بھٹا رائی

 

کثھمنڈو:چین کے  پالے  میں نہیں نیپال ، ہندوستان سے ہی رہیں گے اچھے تعلقات : سابق وزیر اعظم بھٹا رائی

انٹرنیشنل ڈیسک: نیپال کے سابق وزیر اعظم بابو رام  بھٹارائی  کے مطابق ہند نیپال تعلقات تاریخی اور ثقافتی ہیں۔ ہندوستان کی جگہ کوئی نہیں لے سکتا۔ انہوں نے کہا کہ ہندوستان کے کچھ لوگوں کا یہ خیال غلط ہے کہ نیپال مکمل طور پر چین کے کنٹرول میں ہے۔ نیپال کے سابق وزیر اعظم کا بیان ایسے وقت میں سامنے آیا ہے جب نیپال میں سیاسی ہلچل جاری ہے اور نیپال پر چین کی طرف جھکاؤ رکھنے کا الزام عائد کیا جارہا ہے ۔ 

ایک سوال کے جواب میں   بھٹارائی نے کہا- دہلی کے کچھ لوگ یہ سمجھتے ہیں کہ نیپال مکمل طور پر چین کی طرف جھکا ہوا ہے یا اس کے پالے میں چلا گیا ہے۔ یہ صحیح نقطہ نظر نہیں ہے۔ تاریخی طور پر ، ہم ہندوستان کے قریب ہیں۔ چین  بھی ہمارا دوست  ہے ، لیکن ان سے ہماری قربت اتنی نہیں ہے کیونکہ وہ ہمالیہ کے دوسری طرف ہیں۔

ہندوستان اور نیپال کے مابین کشیدہ تعلقات کے بارے میں بھٹارائی نے کہا کہ دونوں ممالک کے درمیان اعلیٰ سطح پر بات چیت نہیں  ہو پارہی ہے ۔ بی جے پی 2014 میں برسراقتدار آئی۔  تقریباً اسی وقت میں ، نیپال میں جمہوریت کا آغاز ہوا۔ مجھے یقین ہے کہ اگر اعلی سطح  کی بات چیت  ہوئی تو تعلقات معمول پر آسکتے ہیں۔ انہوں نے کہا کہ ہندوستان کے ساتھ بگڑتے تعلقات کا سب سے بڑا نقصان نیپالی عوام کو ہوا ہے۔ انہوں نے دونوں ممالک سے بات چیت کے ذریعے معاملات حل کرنے کی اپیل کی۔