کولمبو: سری لنکا میں جمعرات کو ایک روسی طیارہ تقریبا 200 مسافروں کو لے کر ماسکو کے لیے اڑان بھرنے والا تھا کہ سری لنکن حکام نے اسے قبضے میں لے لیا۔ خلیج ٹائمز نے ایئرپورٹ حکام کے حوالے سے اپنی رپورٹ میں یہ اطلاع دی۔ بندرانائیکے بین الاقوامی ہوائی اڈے کے ایک اہلکار نے بتایا کہ ایروفلوٹ ایئربس A330، جو جمعرات کو ماسکو سے کولمبو پہنچا تھا، کو کولمبو کمرشل کورٹ کے حکم سے واپسی سے انکار کر دیا گیا۔
قابل ذکر ہے کہ یوکرین پر حملے کے بعد ماسکو پر عائد مغربی پابندیوں کی وجہ سے روسی ایئر لائن ایرو فلوٹ نے مارچ میں تمام بین الاقوامی پروازیں معطل کر دی تھیں، تاہم اپریل میں کولمبو کے لیے دوبارہ آپریشن شروع کر دیا تھا۔ ادھرروس کی سول ایوی ایشن باڈی نے سفارش کی کہ بیرون ملک رجسٹرڈ کرائے کے ہوائی جہاز چلانے والی روسی ایئر لائنز کو پابندیوں کی وجہ سے طیاروں کو ضبط کرنے سے بچنے کے لیے بیرون ملک اپنی پروازیں روک دیں۔
فی الوقت، یہ ابھی تک واضح نہیں ہے کہ آیا ایس یو289 کی رکاوٹ ان پابندیوں سے متعلق ہے یا نہیں۔ ہوائی اڈے کے حکام کا کہنا تھا کہ 'ہمیں اس کی صحیح وجہ معلوم نہیں ہے، لیکن ہم نے سنا ہے کہ یہ معاملہ کاروباری تنازع سے جڑا ہوا ہے۔' حکام نے یہ بھی بتایا کہ تمام مسافروں اور عملے کو جہاز سے اتار کر ہوٹل لے جایا گیا ہے۔
کوئی تبصرے نہیں:
ایک تبصرہ شائع کریں